အဖွဲ့ချုပ် အဖွဲ့ဝင်များ နှုတ်ထွက်ရန် ကြံ့ဖွံ့ အဖွဲ့ မက်လုံးပေး စည်းရုံး
ဒီဗွီဘီ ၊ ၂၈ ၊ မတ် ၊ ၂ဝဝ၇
မန္တလေးတိုင်း အဖွဲ့ချုပ် ဝင်တွေကို ကြံ့ဖွံ့အာဏာပိုင်တွေက အဖွဲ့က နှုတ်ထွက်ဖို့ မက်လုံးပေးပြီး လိုက်လံစည်းရုံး နေတယ်လို့ သိရပါတယ်။ မြန်မာစစ်အစိုးရ သတင်းစာတွေမှာ NLD အဖွဲ့ဝင်တွေ ပါတီကို ဆန့်ကျင် နှုတ်ထွက်နေတယ်လို့ ပြောဆိုနေချိန်မှာပဲ ပြင်ဦးလွင်မြို့ အဖွဲ့ချုပ် အတွင်းရေးမှူး ဦးဘထူးကို အဖွဲ့ချုပ် ကနေ နှုတ်ထွက်ပေးဖို့ ကြံ့ခိုင် ဖွံ့ဖြိုးရေး အဖွဲ့ဝင်တွေ လိုက်လံ စည်းရုံးနေတာ အခုလအတွင်းမှာပဲ နှစ်ကြိမ်ရှိသွားပြီလို့ သိရပါတယ်။
ဘယ်လို မက်လုံးပေးပြီး စည်းရုံးခဲ့တာလဲလို့ ဦးဘထူးကို မေးကြည့်ရာမှာတော့ အခုလို ပြောပြပါတယ်။
“အဓိကကတော့ ပြင်ဦးလွင်မြို့နယ် ကြံ့ခိုင်ဖွံ့ဖြိုးရေးက ဦးခင်မောင်အေး သူက ရုံးအဖွဲ့မှူးလို့လဲ ပြောပါတယ်။ အဓိကက သူလာ စည်းရုံးတာပါပဲ။ ရက်က (၁၅) ရက် လောက်ကပေါ့။ ဒုတိယ အခေါက်ကတော့ (၂၃) ရက်ပါ၊ ဒီလအတွင်းပေါ့။ ဒေါက်တာ ဘထူးအနေနဲ့ ပြင်ဦးလွင်မြို့နယ် အဖွဲ့ချုပ် မှာ လုပ်နေတာ သူတို့ သိတယ်ပေါ့။ နဂိုက နှုတ်ထွက်သွားကြတဲ့ ဦးစောနောင်လွင်နဲ့ ဒေါ်မေကြည်တို့ဘက်က ကျနော့်ကို မလျှော့ဘူးပေါ့၊ ပါရမယ် ပြောပါတယ်။ ဘာပဲဖြစ်ဖြစ် လိုအပ်တဲ့ အကူအညီရှိရင် ပြောပါ။ သူတို့ အကူအညီ ပေးမယ်ပေါ့လေ။ တိုင်းက ပြည်ခိုင်ဖြိုး တာဝန်ခံ ဦးအောင်ကျော်သာနဲ့လဲ တွေ့ပေးမယ်ပေါ့၊ လိုအပ်ရင် ဝန်ကြီး ဦးအောင်သောင်းနဲ့ပါ တွေ့ပေးဖို့ စီစဉ်ပေးမယ်ပေါ့။ အဓိကကတော့ ကျနော် ဒီမှာ နှုတ်ထွက်ပြီးတော့ သူတို့နဲ့ ပူးပေါင်းဖို့ပေါ့။ အဲဒီအတွက် လာစည်းရုံးတာပါ”
အရင်တုန်းကလဲ မြို့နယ် ကြံ့ဖွံ့ကနေ အဖွဲ့ချုပ် ဝင်တွေကို မက်လုံးပေးပြီး စည်းရုံးခဲ့တာတွေနဲ့ ပတ်သက်လို့လဲ ဦးဘထူးကပဲ သူသိသလောက် အခုလို ပြောပြပါတယ်။
“ဘာတွေ ပေးလိုက်တယ် ဆိုတာကတော့ ကျနော်တို့ မသိဘူးပေါ့။ ဘေးက ကြားတာကတော့ သူတို့ တွေ ရတယ်ပေါ့။ ငွေသားလဲ ရတယ်၊ လုပ်ငန်းလုပ်ခွင့် ကန်ထရိုက်တွေ ရတယ်လို့ အဲဒီလို ကြားတာပဲ။ အခု (၁ဝ) ရက်လောက်ကလဲ ဝံသာနု ဒေါက်တာစိုးလင်းတို့ အဖွဲ့နဲ့ ပူးပေါင်းပြီးတော့ လုပ်ငန်းပါ တွဲလုပ်နေတယ်လို့ ကြားပါတယ်”
အခုလို အဖွဲ့ချုပ် ဝင်တွေကို မက်လုံးပေး နှုတ်ထွက်ခိုင်းနေတာနဲ့ ပတ်သက်လို့ ပြင်ဦးလွင်မြို့ ကြံ့ဖွံ့အသင်းကို ဆက်သွယ်မေးမြန်းခဲ့ပေမဲ့ ဆက်သွယ်လို့ မရခဲ့ပါဘူး။ ပြင်ဦးလွင်မြို့နယ် အဖွဲ့ချုပ် ဝင်တွေကတော့ ဘယ်လို မက်လုံးတွေနဲ့ပဲ နားချနားချ ဒီမိုကရေစီ ရရှိဖို့အတွက် အဖွဲ့ချုပ် လုပ်ငန်းတွေကို ဆက်လက် လုပ်ဆောင်သွားဖို့ ဆုံးဖြတ်ထားတယ်လို့ အခုလို ဆိုပါတယ်။
“ကျနော်တို့ (၁၆) ဦးနဲ့ စနစ်တကျ ပြန်လည် ဖွဲ့စည်းပြီးပြီပေါ့။ အဖွဲ့ချုပ် လုပ်ငန်းတွေကိုလဲ အရှိန်အဟုန်မပျက် ဆက်ပြီးတော့ ကြိုးစားပြီး လုပ်နေတဲ့ အကြောင်းကို ကျနော် ပြောချင်ပါတယ်”
ပြင်ဦးလွင်မြို့ အဖွဲ့ချုပ် စည်းအဖွဲ့ဝင် နောက်တဦးဖြစ်တဲ့ ဦးမြင့်စိုး ပြောပြခဲ့တာပါ။
အခုလို ကြံ့ဖွံ့အနေနဲ့ အဖွဲ့ချုပ် ပါတီဝင်တွေကို ဖိအားပေး ခြိမ်းခြောက်ပြီး နှုတ်ထွက် ခိုင်းနေတာဟာ တိုင်းပြည်အတွက် နစ်နာစေပြီး အဖျက်လုပ်ငန်း ဖြစ်တယ်လို့ မန္တလေးတိုင်း စည်းအဖွဲ့ဝင် ဒေါ်ဝင်းမြမြက အခုလို ကန့်ကွက် ပြောဆိုခဲ့ပါတယ်။
“ကိုယ့်ရဲ့အလုပ်ကို ကိုယ်မလုပ်ဘဲနဲ့ တခြား ပါတီက ပါတီဝင်တွေကို နှုတ်ထွက်ဖို့ လိုက်လုပ်နေတယ် ဆိုတာက ပျက်စီးရာ ပျက်စီးကြောင်း အဖျက်လုပ်ငန်း လုပ်တယ်လို့ပဲ ပြောချင်တယ်။ အမျိုးသား ဒီမိုကရေစီ အဖွဲ့ချုပ် အနေနဲ့ကတော့ တိုင်းပြည်ကောင်းအောင် လုပ်တဲ့အလုပ်နဲ့ကိုပဲ ဗဟိုရော၊ တိုင်းရာ၊ မြို့နယ်ရော၊ ရပ်ကွက်အဆင့်ရော၊ ရိုးရိုး အဖွဲ့ချုပ် ဝင်တွေရော မအားနိုင်ပါဘူး။ ကိုယ့်အလုပ်ကို လုပ်နေကြတာပါ။ ဒါကြောင့်လဲ အမျိုးသား ဒီမိုကရေစီ အဖွဲ့ချုပ် လုပ်ငန်းတွေ အောင်မြင်နေတယ်လို့ပဲ ပြောချင်တယ်”
ဒေါ်ဝင်းမြမြ
